കുഞ്ചാക്കോ ബോബന്‍ നായകനായെത്തുന്ന അള്ള് രാമേന്ദ്രന്‍ റിലീസ് തീയ്യതി പ്രഖ്യാപിച്ചു. സിനിമയ്ക്ക് ക്ലീന്‍ യു സര്‍ട്ടിഫിക്കറ്റ് ലഭിച്ചു. ഫെബ്രുവരി 1ന് ചിത്രം തിയേറ്ററുകളിലേക്കെത്തുകയാണ്. ബിലഹാരി സംവിധാനം ചെയ്യുന്ന സിനിമ മാസ്സ് എന്റര്‍ടെയ്‌നറാണ്. മുമ്പ് ചിത്രത്തിന്റെ ടീസറും ഗാനങ്ങളും ഇറക്കിയിരുന്നു അണിയറക്കാര്‍.
കുഞ്ചാക്കോ ബോബന്‍ തികച്ചും വ്യത്യസ്തമായ ഗെറ്റപ്പിലാണ് ചിത്രത്തിലെത്തുന്നത്. പോലീസ് കോണ്‍സ്റ്റബിളാണ് ചാക്കോച്ചന്റെ കഥാപാത്രം. പ്രേമം ഫെയിം കൃഷ്ണ ശങ്കര്‍, അപര്‍ണ ബാലമുരളി, ഡാര്‍വിന്റെ പരിണാമം ഫെയിം ചാന്ദിനി ശ്രീധരന്‍, സലീം കുമാര്‍, തുടങ്ങി ഒട്ടേറെ താരങ്ങള്‍ സിനിമയിലുണ്ട്.
അനുരാഗകരിക്കിന്‍ വെള്ളം ഫെയിം ജിംഷി ഖാലിദ് ആണ് സിനിമാറ്റോഗ്രാഫി, ആകാശ് ജോസഫ് വര്‍ഗ്ഗീസ് എഡിറ്റിംഗും.മുമ്പ് കുഞ്ചാക്കോ ബോബന്റെ തന്നെ വര്‍ണ്ണ്യത്തില്‍ ആശങ്ക,ഷാജഹാനും പരീക്കുട്ടിയും എന്നീ സിനിമകള്‍ നിര്‍മ്മിച്ച ആഷിഖ് ഉസ്മാന്‍ ആണ് അള്ള് രാമേന്ദ്രന്‍ നിര്‍മ്മിക്കുന്നത്.
