ഇത്തവണത്തെ പ്രണയദിനത്തില്‍ മണിരത്‌നവും എ.ആര്‍. റഹ്മാനും ആരാധകര്‍ക്ക് സമ്മാനവുമായി എത്തി. കാട്ര് വെളിയിടെ എന്ന മണിരത്‌നം പ്രണയചിത്രത്തിന്റെ 'വാന്‍ വരുവാന്‍' എന്നു തുടങ്ങുന്ന പാട്ടിന്റെ പ്രൊമോ വീഡിയോ മണിരത്‌നം പ്രണയദിനത്തില്‍ ആരാധകര്‍ക്കായി പുറത്തിറക്കി.
ഒരു മിനിറ്റ് ആണ് വീഡിയോയുടെ ദൈര്‍ഘ്യം. കാര്‍ത്തിയുടെയും അതിഥി റാവുവിന്റെയും ലഡാക്കില്‍ വച്ചുള്ള പ്രണയനിമിഷങ്ങളാണ് വീഡിയോയില്‍. ശാഷ തിരുപ്പതി പാടിയ പാട്ടിന് വരികളൊരുക്കിയിരിക്കുന്നത് വൈരമുത്തുവാണ്. ചിത്രത്തിലെ ആദ്യഗാനം നേരത്തെ തന്നെ യൂട്യൂബില്‍ ഹിറ്റായിരുന്നു.
മഹാകവി ഭാരതീയരുടെ ഒരു കവിതയില്‍ നിന്നും പ്രചോദനമുള്‍ക്കൊണ്ടാണ് ചിത്രത്തിന് കാട്ര് വെളിയിെ എന്ന് പേര് നല്‍കിയത്. മദ്രാസ് ടാക്കീസിന്റെ ബാനറില്‍ മണിരത്‌നം തന്നെയാണ് ചിത്രം നിര്‍മ്മിച്ചിരിക്കുന്നത്. ഊട്ടിയിലും ലഡാക്കിലുമായാണ് ചിത്രീകരണം നടന്നത്. ചിത്രം തമിഴ്, മലയാളം, തെലുങ്ക് ഭാഷകളിലായാണ് പുറത്തിറങ്ങുക.
