ഇന്ത്യൻ പ്രധാനമന്ത്രി നരേന്ദ്ര മോദി കഴിഞ്ഞ ദിവസം ആയുഷ്മാൻ ഭാരത് ഡിജിറ്റൽ മിഷന്റെ ഡിജിറ്റൽ ഹെൽത്ത് ഐഡി പ്രഖ്യാപിച്ചു. പദ്ധതി പ്രകാരം ഓരോ ഇന്ത്യൻ പൗരനും ഹെൽത്ത് ഐഡി കാർഡ് ലഭിക്കും. ഓരോ വ്യക്തിയുമായി ബന്ധപ്പെട്ട എല്ലാ ആരോഗ്യവിവരങ്ങളും ഹെൽത്ത് ഐഡി കാർഡിൽ ലഭ്യമാകും.
എന്താണ് ദേശീയ ആരോഗ്യ ഐഡി സംവിധാനം?
ഓരോ വ്യക്തിയുടേയും ആരോഗ്യവിവരങ്ങളുടെ കലവറയാകും നാഷണൽ ഹെൽത്ത് ഐഡി. സ്വന്തം ആരോഗ്യവിവരം ഡിജിറ്റലാക്കാൻ ആഗ്രഹിക്കുന്ന ഓരോ വ്യക്തിക്കും ഹെൽത്ത ഐഡി ക്രിയേറ്റ് ചെയ്യാമെന്നാണ് നാഷണൽ ഹെൽത്ത് അതോറിറ്റി അറിയിച്ചിരിക്കുന്നത്. ഓരോ ഹെൽത്ത് ഐഡിയും ഒരു ഹെൽത്ത് ഡാറ്റ കൺസന്റ് മാനേജറുമായി ലിങ്ക് ചെയ്തിട്ടുണ്ടാവും - അതായത് നാഷണൽ ഡിജിറ്റൽ ഹെൽത്ത് മിഷൻ. ഒരു രോഗിയുടെ ആരോഗ്യവിവരം അറിയുന്നതിനായി ഇത് ഉപയോഗിക്കാനാവും. ഓരോ വ്യക്തിയുടേയും അടിസ്ഥാന വ്യക്തിഗതവിവരങ്ങൾ , മൊബൈൽ നമ്പർ, അല്ലെങ്കിൽ ആധാർനമ്പർ നൽകി ഹെൽത്ത് ഐഡി ഉണ്ടാക്കാം. ഓരോ വ്യക്തിക്കും യുണീക്കായിരിക്കും ഈ ഐഡി. തന്റെ എല്ലാ ഹെൽത്ത് റെക്കോർഡുകളും ഈ ഐഡിയിലേക്ക് ലിങ്ക് ചെയ്യാനാവും.
ഡിജിറ്റൽ ഹെൽത്ത് സംവിധാനത്തിൽ 14 അക്ക തിരിച്ചറിയൽ നമ്പറാണ് ഉപയോഗിക്കുന്നത്. ഈ സംവിധാനത്തിലൂടെ സാർവത്രിക ആരോഗ്യ പരിരക്ഷ, ചികിത്സാസഹായങ്ങൾ, എന്നിവ കുറ്റമറ്റ രീതിയിൽ നടപ്പാക്കാൻ കഴിയും. കൺസന്റ് മാനേജ്മെന്റിന് വേണ്ടിയാണ് പിഎച്ച്ആർ അഡ്രസ്സ്. ഓരോ വ്യക്തിയുടേയും സമ്മതപ്രകാരം അവരുടെ ഹെൽത്ത്റെക്കോർഡുകൾ ആരോഗ്യപരിരക്ഷയ്ക്കും ചികിത്സക്കും മറ്റും ഉപയോഗിക്കാം.
എല്ലാ ടെസ്റ്റുകളുടേയും വിവരങ്ങൾ, അസുഖവിവരങ്ങൾ, സന്ദർശിച്ചിരിക്കുന്ന ഡോക്ടർമാരുടെ വിവരങ്ങൾ, മരുന്നുകൾ, ഡയഗ്നോസിസ് വിവരങ്ങൾ ഇവയെല്ലാം ഹെൽത്ത അക്കൗണ്ടിൽ ലഭ്യമാകും. ഈ വിവരങ്ങളെല്ലാം പോർട്ടബിളും എളുപ്പം ലഭിക്കുന്നതുമാകയാൽ പുതിയ സ്ഥലത്തേക്ക് മാറുമ്പോഴും പുതിയ ഡോക്ടറെ കാണുമ്പോഴും ഉപയോഗപ്പെടുത്താനാവും.
എൻഡിഎച്ച്എമ്മിന് കീഴിൽ വരുന്ന ഹെൽത്ത് ഐഡി സൗജന്യമാണ്.
എങ്ങനെ രജിസ്റ്റർ ചെയ്യാം
ഹെൽത്ത് ഐഡി വെബ്പോർട്ടലിൽ സ്വയം രജിസ്റ്റർ ചെയ്യുകയോ, ഗൂഗിൾ പ്ലേസ്റ്റോറിൽ നിന്നും എബിഡിഎം ഹെൽത്ത് റെക്കോർഡ്സ് ആപ്പ് ഡൗൺലോഡ് ചെയ്തോ ഐഡി രജിസ്റ്റർ ചെയ്യാം.
മൊബൈൽ നമ്പർ അല്ലെങ്കിൽ ആധാർനമ്പർ ആണ് രജിസ്റററേഷന് ആവശ്യം. ഗുണഭോക്താവിന്റെ ആരോഗ്യവിവരങ്ങള്‍ https://healthid.ndhm.gov.in/ എന്ന വെബ് സൈറ്റിലൂടെ രജിസ്റ്റര്‍ ചെയ്യാം.
https://healthid.ndhm.gov.in/ വെബ്‌സൈറ്റ് സന്ദര്‍ശിക്കുക.
വെബ്സൈറ്റിൽ ഹെൽത്ത് ഐഡി സെക്ഷനിലെ ക്രിയേറ്റ് ഹെൽത്ത് ഐഡി നൗ എന്ന ലിങ്കിൽ ക്ലിക്ക് ചെയ്യുക
തുറന്നുവരുന്ന പേജിൽ മൂന്ന് ഓപ്ഷനുകൾ കാണാം.
ആധാർ കാർഡ് ഉപയോഗിച്ചാണ് ഐഡി ക്രിയേറ്റ് ചെയ്യുന്നതെങ്കിൽ ആദ്യ ഓപ്ഷനിൽ ക്ലിക്ക് ചെയ്യാം. അവിടെ 12 അക്ക ആധാർ നമ്പർ നൽകാം. രണ്ടാമത്തെ ഓപ്ഷനാണെങ്കിൽ മൊബൈൽ നമ്പർ ഉപയോഗിച്ച് ഹെൽത്ത് ഐഡി ക്രിയേറ്റ് ചെയ്യാം.
ആധാർ ആണ് ഹെൽത്ത ഐഡി ക്രിയേറ്റ് ചെയ്യാൻ ഉപയോഗിക്കുന്നതെങ്കിൽ ആധാർ മൊബൈലുമായി ലിങ്ക് ചെയ്തിട്ടുണ്ടെന്ന് ഉറപ്പാക്കണം. ഒടിപി വെരിഫിക്കേഷൻ ഉണ്ടാവും.
രജിസ്ട്രേഷനായി വ്യക്തികളുടെ അടിസ്ഥാനവിവരങ്ങൾ നൽകാം. പൂർത്തിയായ ശേഷം വെർച്വൽ ഹെൽത്ത് ഐഡി ഡൗൺലോഡ് ചെയ്തെടുക്കാം.
