ശ്രീനിവാസന്‍ മുഖ്യവേഷത്തിലെത്തുന്ന പവിയേട്ടന്റെ മധുരച്ചൂരല്‍ ചിത്രത്തിന്റെ ട്രയിലറെത്തി. കുടുംബചിത്രമാണിതെന്നാണ് ട്രയിലര്‍ നല്‍കുന്ന സൂചന. പവിയുടേയും അവരുടെ ഭാര്യയുടേയും ജീവിതമാണ് സിനിമ പറയുന്നത്. ശ്രീനിവാസന്‍ കഥാപാത്രം പവിയും ലെന ചെയ്യുന്ന അവരുടെ ഭാര്യ കഥാപാത്രവും തമ്മിലുള്ള ബന്ധത്തിന്റെ ആഴമാണ് സിനിമയില്‍. ജാതിയുടേയും മതത്തിന്റേയും അതിര്‍വരമ്പുകള്‍ ഭേദിച്ച് വിവാഹിതരായ ദമ്പതികളുടെ കഥയാണ് സിനിമ പറയുന്നത്.
ശ്രീകൃഷ്ണന്‍ സംവിധാനം ചെയ്യുന്ന സിനിമയാണിത്. രണ്ട് വര്‍ഷങ്ങള്‍ക്ക് ശേഷം നടന്‍ ശ്രീനിവാസന്‍ മനോഹരമായ ഒരു തിരക്കഥയുമായി തിരിച്ചെത്തിയിരിക്കുകയാണ്. സിനിമയിലെ സംഭാഷണവും അദ്ദേഹത്തിന്റേതുതന്നെയാണ്. പി സുകുമാര്‍ ആണ് ക്യാമറയ രഞ്ജന്‍ അബ്രഹാം എഡിറ്റിംഗ് നിര്‍വഹിച്ചിരിക്കുന്നു. വിസി സുധാകരന്‍, സി വിജയന്‍, സുധീര്‍ സി നമ്പ്യാര്‍ എന്നിവര്‍ ചേര്‍ന്നാണ് ചിത്രം നിര്‍മ്മിച്ചിരിക്കുന്നത്.
ഈ മാസം ആദ്യം ചിത്രത്തിലെ ഒരു വീഡിയോ ഗാനം റിലീസ് ചെയ്തിരുന്നു. അനുരാഗനീല നദി നീന്തി എന്നു തുടങ്ങുന്ന ഗാനത്തിന് മികച്ച പ്രതികരണമാണ് പ്രേക്ഷകരില്‍ നിന്നും ലഭിച്ചത്. റഫീഖ് അഹമ്മദിന്റെ വരികള്‍ക്ക് സി രഘുനാഥ് ഈണം നല്‍കിയ ഗാനമായിരുന്നു. അടുത്ത മാസം ചിത്രം തിയേറ്ററുകളിലേക്കെത്തുമെന്നാണ് പ്രതീക്ഷിക്കുന്നത്.
