ശ്രീനിവാസനും ലെനയും ഒന്നിക്കുന്ന പവിയേട്ടന്റെ മധുരച്ചൂരല്‍ എന്ന ചിത്രത്തിലെ ഗാനം 'അനുരാഗ നീല നീന്തി' 90കളിലെ ഗാനം പോലെ മനോഹരമായ മെലഡിയാണ്. അടുത്തകാലങ്ങളില്‍ കേട്ടതില്‍ വച്ചേറ്റവും മാധുര്യമേറിയ ഗാനവുമായിരിക്കുമിതെന്ന് തീര്‍ച്ച.
കെഎസ് ചിത്രയാണ് ഗാനം ആലപിച്ചിരിക്കുന്നത്. റഫീഖ് അഹമ്മദിന്റെ വരികള്‍ക്ക് സി രഘുനാഥ് ഈണം നല്‍കിയിരിക്കുന്നു. ശ്രീനിവാസനും ലെനയും ചെയ്യുന്ന കഥാപാത്രങ്ങളുടെ പ്രണയമാണ് ഗാനത്തിലൂടെ പറയുന്നത്. കഥാപാത്രങ്ങളുടെ കുട്ടിക്കാലത്തിലേക്കും അവരുടെ പ്രണയവും മറ്റുമെല്ലാം ഗാനരംഗത്തു കാണിക്കുന്നു. ജാതിയുടേയും മതത്തിന്റേയും അതിര്‍വരമ്പുകളില്ലാതെ വിവാഹിതരായ ദമ്പതികളുടെ കഥയാണ് സിനിമ എന്നാണ് റിപ്പോര്‍ട്ടുകള്‍.
രണ്ട് വര്‍ഷത്തിന് ശേഷം നടന്‍ ശ്രീനിവാസന്‍ മനോഹരമായ തിരക്കഥയുമായി തിരിച്ചെത്തിയിരിക്കുകയാണ്. സിനിമയിലെ പ്രധാനകഥാപാത്രം ശ്രീനിവാസന്റേതാണ്. ലെന അദ്ദേഹത്തിന്റെ ഭാര്യവേഷത്തിലാണെത്തുന്നത്. ശ്രീകൃഷ്ണന്‍ ആണ് ചിത്രം സംവിധാനം ചെയ്തിരിക്കുന്നത്. വിസി സുധാകരന്‍, സി വിജയന്‍, സുധീര്‍ സി നമ്പ്യാര്‍ എന്നിവരാണ് സിനിമ നിര്‍മ്മിച്ചിരിക്കുന്നത്.
