നാല്പതില്‍ കുറവ് ദിവസങ്ങള്‍ കൊണ്ട് ചിത്രീകരണം പൂര്‍ത്തിയാക്കിയ മോഹന്‍ലാല്‍ നായകനാകുന്ന നീരാളി റിലീസിംഗ് തീയ്യതി തീരുമാനിച്ചു. അജോയ് വര്‍മ്മ സംവിധാനം ചെയ്യുന്ന സിനിമ ജൂണില്‍ തിയേറ്ററിലെത്തുമെന്നാണ് റിപ്പോര്‍ട്ടുകള്‍.
നീരാളി ചിത്രീകരണത്തിന്റെ ഭൂരിഭാഗവും മുംബൈയിലും പൂനെയിലുമായിരുന്നു. ബോളിവുഡില്‍ നിന്നുമാണ് ചിത്രത്തിന്റെ അണിയറക്കാര്‍. സുരാജ് വെഞ്ഞാറമൂട്, നദിയ മൊയ്തു, പാര്‍വ്വതി നായര്‍ എന്നിവരും സിനിമയുടെ ഭാഗമാകുന്നു.
ത്രില്ലര്‍ ചിത്രമായാണ് സിനിമ ഒരുക്കിയിരിക്കുന്നത്. രത്‌നക്കല്ലുകളെ പറ്റി റിസര്‍ച്ച് ചെയ്യുന്ന ആളാണ് ലാലേട്ടന്റെ കഥാപാത്രം. നദിയ മൊയ്തു മോഹന്‍ലാലിന്റെ ഭാര്യാവേഷമാണ് ചെയ്യുന്നത്. അനു സിതാരയും മണിയന്‍ പിള്ള രാജുവിന്റെ മകന്‍ നിരഞ്ജും ഒന്നിക്കുന്ന രഞ്ജിത്ത് സിനിമ ഒരു ബിലാത്തിക്കഥ ആയിരിക്കും മോഹന്‍ലാലിന്റെ അടുത്ത ചിത്രമെന്നാണ് റിപ്പോര്‍ട്ടുകള്‍.
