മോളിവുഡിന്റെ സ്വന്തം ദുല്‍ഖര്‍ സല്‍മാന്‍ ഇപ്പോള്‍ ദേശിംഗ പെരിയമസ്വാമിയുടെ കണ്ണും കണ്ണും കൊള്ളൈ അടിത്താല്‍ എന്ന ചിത്രത്തിന്റെ തിരക്കിലാണ്. വാലന്റൈന്‍സ് ഡേയുടെ ദിവസം ചിത്രത്തിന്റെ ഫസ്റ്റ്ലുക്ക് പുറത്തുവിട്ടിരുന്നു. ഈ ചിത്രത്തിന്റെ ഷൂട്ടിംഗ് കഴിഞ്ഞാല്‍ താരം ബോളിവുഡിലേക്ക് തിരിക്കുമെന്നാണ് താരത്തോട് അടുത്ത വൃത്തങ്ങള്‍ പറയുന്നത്. സോയ ഫാക്ടര്‍ എന്ന ചിത്രത്തില്‍ സോനം കപൂറിനൊപ്പമാണ് ബോളിവുഡില്‍ താരം അഭിനയിക്കുന്നത്.
അനുജ ചൗഹാന്‍ എഴുതിയ ദ സോയ ഫാക്ടര്‍ എന്ന പോപുലര്‍ നോവലിന്റെ ചലച്ചിത്രാവിഷ്‌കാരമാണ് സോയ ഫാക്ടര്‍ എന്ന സിനിമ.2010ലെ ക്രിക്കറ്റ് ലോകകപ്പില്‍ ഒരു യുവതി ഇന്ത്യന്‍ ക്രിക്കറ്റ് ടീമിന്റെ ഭാഗ്യതാരമാകുന്നതാണ് കഥ. ഏപ്രില്‍ അവസാനത്തോടെ കണ്ണും കണ്ണും കൊള്ളൈ അടിത്താല്‍ എന്ന ചിത്രത്തിനു ശേഷം ദുല്‍ഖര്‍ സോയഫാക്ടര്‍ ടീമിനൊപ്പം ചേരുമെന്നാണ് അറിയുന്നത്.
ദുല്‍ഖര്‍ സോയ ഫാക്ടറിനുവേണ്ടി ക്രിക്കറ്റ് പരിശീലനം തുടങ്ങിയതായി റിപ്പോര്‍ട്ടുകളുണ്ട്. സിനിമയില്‍ ക്രിക്കറ്റ് പ്രേമിയായാണ് ദുല്‍ഖര്‍ എത്തുന്നത്. എന്നാല്‍ വാര്‍ത്തകള്‍ വെറും റൂമറുകള്‍ മാത്രമാണെന്നും താരം ഇതുവരെയും ഒരു പരിശീലനവും തുടങ്ങിയിട്ടില്ലെന്നുമാണ് താരത്തിനൊടടുത്തവര്‍ പറയുന്നത്.
ആകാശ് ഖുറാന സംവിധാനം ചെയ്ത ദുല്‍ഖര്‍ സല്‍മാന്‍, ഇര്‍ഫാന്‍ ഖാന്‍, മിഥില പാല്‍ക്കര്‍ എന്നിവര്‍ ഒന്നിക്കുന്ന ട്രാവല്‍ മൂവി കാരവാന്‍ ഉടന്‍ തിയേറ്ററുകളിലേക്കെത്തും.
