സിനിമതാരം നിവിന്‍ പോളിയുടെ പിറന്നാള്‍ ദിനമാണിന്ന്. താരത്തിന്റെ കരിയറിലെ തന്നെ മികച്ച ചിത്രം കായംകുളം കൊച്ചുണ്ണി തിയേറ്ററുകളിലെത്തിയതു കൂടാതെ, നിവിന്‍ പോളിയുടെ അടുത്ത ചിത്രം മിഖായേലിന്റെ അണിയറക്കാര്‍ ഒരു സര്‍പ്രൈസ് ടീസര്‍ പുറത്തുവിട്ടിരിക്കുകയാണിന്ന്. മമ്മൂട്ടി തന്റെ സോഷ്യല്‍ മീഡിയ പേജിലൂടെയാണ് ടീസര്‍ പുറത്തിറക്കിയിരിക്കുന്നത്. കായംകുളം കൊച്ചുണ്ണിക്കൊപ്പം തിയേറ്ററിലും ടീസര്‍ പ്രദര്‍ശിപ്പിക്കും.
ദ ഗ്രേറ്റ് ഫാദര്‍, അബ്രഹാമിന്റെ സന്തതികള്‍ തുടങ്ങിയ മമ്മൂട്ടി ചിത്രങ്ങള്‍ ഒരുക്കിയ ഹനീഫ് അദേനിയാണ് മിഖായേല്‍ സംവിധാനം ചെയ്യുന്നത്. ഫാമിലിയെ ലക്ഷ്യം വച്ചുള്ള ത്രില്ലര്‍ ചിത്രത്തില്‍ നിവിന്‍പോളി ഡോക്ടറായാണ് എത്തുന്നത്. സ്‌റ്റൈലിഷായിട്ടുള്ള പുതിയ ലുക്കിലാണ് താരം ചിത്രത്തിലെത്തുന്നത്.
ഉണ്ണിമുകുന്ദന്‍ ചിത്രത്തില്‍ ഒരു പ്രധാനവേഷത്തിലെത്തുന്നു. മഞ്ജിമ മോഹന്‍, ജെഡി ചക്രവര്‍ത്തി, സിദ്ദീഖ്, രഞ്ജി പണിക്കര്‍, അശോകന്‍, ശാന്തികൃഷ്ണ, കലാഭവന്‍ ഷാജോണ്‍, കെപിഎസി ലളിത, എന്നിവര്‍ സഹതാരങ്ങളായെത്തുന്നു. കോഴിക്കോട് സിനിമയുടെ ചിത്രീകരണം നടന്നുകൊണ്ടിരിക്കുകയാണ്. ആന്റോ ജോസഫ് ഫിലിം കമ്പനിയുടെ ബാനറില്‍ ആന്റോ ജോസഫ് ആണ് ചിത്രം നിര്‍മ്മിക്കുന്നത്.
