പൃഥ്വിരാജിന്റെ സയന്‍സ് ഫിക്ഷന്‍ ചിത്രം 9 ആദ്യഗാനം റിലീസ് ചെയ്തു. സോഷ്യല്‍ മീഡിയയിലൂടെയാണ് ഗാനം റിലീസ് ചെയ്തത്. അകലെ എന്നു തുടങ്ങുന്ന ഗാനം റൊമാന്റിക് ട്രാക്കിലുള്ളതാണ്. പൃഥ്വിരാജ്, മംമ്താമോഹന്‍ദാസ് എന്നിവരാണ് പ്രധാനതാരങ്ങള്‍. 100 ഡെയ്‌സ് ഓഫ് ലവ് സംവിധായകന്‍ ജീനസ് മുഹമ്മദ് ആണ് 9 സംവിധാനം ചെയ്തിരിക്കുന്നത്.
ഹൊറര്‍, സയന്‍സ് ഫിക്ഷന്‍, സൈക്കോളജിക്കല്‍ ത്രില്ലര്‍ എന്നീ കാറ്റഗറിയിലുള്ള ആദ്യ മലയാളസിനിമയാണിത് എന്നാണ് അണിയറക്കാര്‍ അവകാശപ്പെടുന്നത്. പൃഥ്വിരാജിന്റെ അഭിപ്രായത്തില്‍ ചിത്രത്തെ ഏതെങ്കിലും ഒരു കാറ്റഗറിയില്‍ പ്രത്യേകമായിപ്പെടുത്താന്‍ പ്രയാസമാണെന്നാണ്. സിനിമ പല വികാരങ്ങളും പറയുന്നുണ്ടെങ്കിലും അച്ഛനും മകനും തമ്മിലുള്ള ബന്ധമാണ് സിനിമയ്ക്ക് അടിസ്ഥാനം.
പ്രകാശ് രാജ്, മംമ്ത മോഹന്‍ദാസ്, വാമിഖ ഗബ്ബി, ടോണി ലൂക്ക, രാഹുല്‍ മാധവ്, ആദില്‍ ഇബ്രാഹിം എന്നിവര്‍ സഹതാരങ്ങളായി ചിത്രത്തിലുണ്ട്.
പൃഥ്വിരാജ് ഈ ചിത്രത്തിലൂടെ സ്വന്തമായി നിര്‍മ്മാണരംഗത്തേക്ക് കടന്നിരിക്കുകയാണ്. പൃഥ്വിരാജ് പ്രൊഡക്ഷന്‍സ് എന്ന പേരില്‍ സോണി പിക്‌ചേഴ്‌സ് ഇന്റര്‍നാഷണല്‍ പ്രൊഡക്ഷന്‍സിന്റെ സഹകരണത്തോടെയാണ് 9 നിര്‍മ്മിച്ചിരിക്കുന്നത്.
