സംവിധായകന്‍ കമലിന്റെ മകനും യുവസംവിധായകനുമായ ജീനസ് മുഹമ്മദിന്റെ അടുത്ത പ്രൊജക്ട് പൃഥ്വിരാജ് സുകുമാരന്‍ നായകനാകുന്ന 9 ആണ്. സയന്‍സ് ഫിക്ഷന്‍ ഹൊറര്‍ ത്രില്ലര്‍ ചിത്രമാണ്.
സിനിമയുടെ മോഷന്‍ പോസ്റ്റര്‍ അടുത്തിടെ പുറത്തിറക്കിയിരുന്നു. പൃഥ്വിയുടെ കഥാപാത്രം ഇരുട്ടില്‍ പന്തവുമായി നില്‍ക്കുന്നതാണ് പോസ്റ്ററില്‍. വിവിധ നിറങ്ങളിലുള്ള ബാക്ക്ഗ്രൗണ്ടും. ഡിജെ ശേഖര്‍ മേനോന്‍ ആണ് പോസ്റ്ററില്‍ മ്യൂസിക് ചെയ്തിരിക്കുന്നത്. ജീനസിന്റെ ആദ്യസിനിമ 100 ഡെയ്‌സ് ഓഫ് ലവ് എന്ന ചിത്രത്തില്‍ അഭിനയിച്ചിരുന്നു അദ്ദേഹം. ജീനസ് മുഹമ്മദ് തന്നെയാണ് സിനിമയുടെ കഥ എഴുതിയിരിക്കുന്നത്. ശേഖര്‍ മേനോനും ഷാന്‍ റഹ്മാനും ചേര്‍ന്നാണ് സിനിമയ്ക്ക് സംഗീതം ഒരുക്കുന്നത്. മറ്റുതാരങ്ങള്‍ ആരൊക്കെയാണെന്ന് ഇതുവരെ അറിഞ്ഞിട്ടില്ല.
പൃഥ്വി തന്റെ ഫേസ്ബുക്കില്‍ ചിത്രത്തിന്റെ കേരളത്തിലെ ചിത്രീകരണം പൂര്‍ത്തിയായതായി കുറിച്ചിരുന്നു. പുറത്തുവന്ന റിപ്പോര്‍ട്ടുകള്‍ ശരിയാണെങ്കില്‍ സിനിമയില്‍ പൃഥ്വി ഒരു ശാസ്ത്രജ്ഞനാണ്. ഇപ്പോള്‍ ടീം ഹിമാലയയിലേക്ക് ചിത്രീകരണത്തിനായി പോയിരിക്കുകയാണ്.
