പുലിമുരുകന്‍ സംവിധായകന്‍ അടുത്തതായി ഒരുക്കുന്ന ചിത്രത്തില്‍ നിവിന്‍ പോളി പോലീസ് ഓഫീസറായി എത്തുന്നുവെന്ന് റിപ്പോര്‍ട്ടുകള്‍.
റിപ്പോര്‍ട്ടുകള്‍ ശരിയായാല്‍ നിവിന്റെ കരിയറിലെ രണ്ടാമത്തെ പോലീസ് വേഷമാവുമിത്. നിവിന്റ ആക്ഷന്‍ ഹീറോ ബിജു എന്ന ചിത്രത്തിലെ പോലീസ് വേഷം പ്രേക്ഷകര്‍ ഇരുകയ്യും നീട്ടി സ്വീകരിച്ചിരുന്നു. അതിഭാവുകത്വങ്ങളില്ലാതെ സാധാരണ സിനിമകളില്‍ നിന്നും വ്യത്യസ്തമായ ഒരു പോലീസുകാരനായിരുന്നു സിനിമയിലുണ്ടായിരുന്നത്. ഇതുവരെ മലയാള സിനിമയില്‍ കണ്ടിട്ടില്ലാത്ത ഒരു പോലീസ് നായകനെയായിരുന്നു എബ്രിഡ് ഷൈന്‍ സിനിമയില്‍ ഒരുക്കിയത്.
റിപ്പോര്‍ട്ടനുസരിച്ച് ഉദയ്കൃഷ്ണയാണ് സിനിമയ്ക്ക് തിരക്കഥ ഒരുക്കുന്നത്. മൂത്തോന്‍, റിച്ചി, ഞണ്ടുകളുടെ നാട്ടില്‍ ഒരിടവേള എന്നിവയാണ് നിവിന്റെ പുറത്തിറങ്ങാനിരിക്കുന്ന സിനിമകള്‍.
