ആദ്യറിലീസില്‍ പ്രേക്ഷകര്‍ തിയേറ്ററിലെത്തിയിലെങ്കിലും പിന്നീട് പ്രിയപ്പെട്ട ചിത്രമായി മാറിയ ഗപ്പി വീണ്ടും തിയേറ്ററുകളിലേക്കെത്തുന്നു. ജോണ്‍പോള്‍ ജോര്‍ജ്ജ് സംവിധാനം ചെയ്ത് ചിത്രത്തില്‍ ടൊവിനോ തോമസും മാസ്റ്റര്‍ ചേതനും മുഖ്യവേഷങ്ങളിലെത്തി. തിയേറ്ററുകളില്‍ മികച്ച കളക്ഷന്‍ ലഭിച്ചില്ലെങ്കിലും ടൊറന്റില്‍ വന്‍ സ്വീകാര്യത നേടാന്‍ ചിത്രത്തിനായി.
ജനുവരി 21ന് കേരളത്തിലെ മൂന്നു കേന്ദ്രങ്ങളില്‍ ആണ് ചിത്രം വീണ്ടും റിലീസ് ചെയ്യുന്നത്. തിരുവനന്തപുരത്ത് ശ്രീ വൈശാഖ്, എറണാകുളം സവിത, മലപ്പുറം നവീന്‍ എന്നീ തിയേറ്ററുകളില്‍ രാവിലെ എട്ടുമണിക്ക് ചിത്രം പ്രദര്‍ശിപ്പിക്കും. ചിത്രത്തിലെ നായകന്‍ ടൊവിനോ തോമസ് ഫേസ്ബുക്ക് പേജിലൂടെയാണ് റീറിലീസിംഗ് പ്രഖ്യാപിച്ചത്.
ശ്രീനിവാസന്‍, അലന്‍സിയര്‍, സൂധീര്‍ കരമന, ദിലീഷ് പോത്തന്‍, രോഹിണി എന്നിവരും ചിത്രത്തില്‍ പ്രധാനവേഷത്തിലെത്തി. ഗപ്പിയിലെ അഭിനയത്തിലൂടെ മാസ്റ്റര്‍ ചേതന്‍ മികച്ച ബാലതാരത്തിനുള്ള സംസ്ഥാനസര്‍ക്കാരിന്റെ പുരസ്‌കാരവും സ്വന്തമാക്കിയിരുന്നു.
