എടുത്തു പറയാന്‍ സൂപ്പര്‍സ്റ്റാറുകളോ കോടികളുടെ അവകാശവാദങ്ങളോ ഇല്ലാതെ മധുരിക്കുന്ന ഓര്‍മ്മകളുമായി കോലുമിട്ടായ് എന്ന ചിത്രം ഒക്ടോബര്‍ 28ന് തിയേറ്ററിലേക്കെത്തുകയാണ്.
സുന്ദരമായ ഗ്രാമീണതയില്‍ നിഷ്‌കളങ്കരായ കുട്ടികളുടെ സ്‌കൂള്‍ജീവിതപശ്ചാത്തലവുമായി മലയാളസിനിമയിലെ മുന്‍നിര ബാലതാരങ്ങളായ ഗൗരവ് മേനോന്‍, ആകാശ്, സന്തോഷ്, മീനാക്ഷി (അമര്‍ അക്ബര്‍ അന്തോണി ഫെയിം) എന്നിവര്‍ പ്രധാനവേഷത്തിലെത്തുന്ന കോലുമിട്ടായ് കുട്ടികള്‍ക്കും മുതിര്‍ന്നവര്‍ക്കും ഒരു പോലെ ആസ്വദിക്കാവുന്ന ചിത്രമാണ്.
നവാഗതനായ അരുണ്‍വിശ്വം സംവിധാനം ചെയ്യുന്ന ചിത്രം ക്രയോണ്‍സ് പിക്‌ചേഴ്‌സിന്റെ ബാനറില്‍ അഭിജിത് അശോകന്‍ ആണ് നിര്‍മ്മിക്കുന്നത്. സന്തോഷ് അനിമയാണ് ഛായാഗ്രഹണം നിര്‍വഹിക്കുന്നത്. അരുണ്‍ വിശ്വം, അഭിജിത് അശോകന്‍ എന്നിവര്‍ ചേര്‍ന്ന് തിരക്കഥ-സംഭാഷണം എഴുതുന്നു.ബി.കെ ഹരിനാരായണന്റെ വരികള്‍ക്ക് ശ്രീരാജ് കെ സഹജന്‍ സംഗീതം നിര്‍വഹിക്കുന്നു.
സൈജു കുറുപ്പ്, ഡോക്ടര്‍ റോണി, ദിനേശ് പ്രഭാകര്‍, കലാഭവന്‍ പ്രജോദ്, അമിത് ചക്കാലയ്ക്കല്‍, ബിനീഷ് ബാസ്റ്റിന്‍, സോഹന്‍ സിനുലാല്‍, ഗോകുലന്‍, ആകാശ് സന്തോഷ്, ഷറീജ്, ഷിബു മരട്, അഞ്ജലി നായര്‍, ദേവി അജിത്, കൃഷ്ണപ്രഭ തുടങ്ങിയവരാണ് പ്രമുഖ താരങ്ങള്‍.
മികച്ച അഭിനേതാക്കളെക്കൊണ്ട് ശ്രദ്ധേയമായ കോലുമിട്ടായ് സിനിമയുടെ മനോഹരമായ ട്രയിലര്‍ കാണാം.
