ഇരുപത്തിരണ്ടാമത് രാജ്യാന്തരചലച്ചിത്രമേളയ്ക്ക് ഇന്ന്(ഡിസംബര്‍ 8 2017) തുടക്കം. സിയാദ് ദൗയിരി സംവിധാനം ചെയ്ത ലെബനീസ് ചിത്രം 'ദ ഇന്‍സള്‍ട്ട്' ആണ് ഉദ്ഘാടന ചിത്രം. എട്ടു ദിവസം നീണ്ടു നില്‍ക്കുന്ന മേളക്ക് തിരുവനന്തപുരത്ത് നിശാഗന്ധി ഓഡിറ്റോറിയത്തില്‍ വച്ചു നടക്കുന്ന ചടങ്ങില്‍ തിരി തെളിയും. പ്രകാശ് രാജ്, മാധവി മുഖര്‍ജി എന്നിവര്‍ ഉദ്ഘാടന ചടങ്ങില്‍ പങ്കെടുക്കും.

 14 തിയേറ്ററുകളിലായി ആകെ 445 പ്രദര്‍ശനങ്ങളാണ് മേളയിലുണ്ടാകുക. 65രാജ്യങ്ങളില്‍ നിന്നുള്ള 190സിനിമകള്‍ പ്രദര്‍ശനത്തിനുണ്ട്. സീറ്റുകള്‍ നേരത്തെ റിസര്‍വ് ചെയ്യാനുള്ള സൗകര്യം ഒരുക്കിയിട്ടുണ്ട്. ഐഎഫ്എഫ്‌കെ വെബ്‌സൈറ്റ്,മൊബൈല്‍ അപ്ലിക്കേഷന്‍ എന്നിവ ഉപയോഗിച്ചും സീറ്റ് റിസര്‍വേഷന്‍ സാധ്യമാണ്.

വേദികളില്‍ നിന്നും നേരിട്ടും ബുക്ക് ചെയ്യാം. രാവിലെ 8മുതല്‍ വൈകീട്ട് 9വരെ റിസര്‍വേഷന്‍ സൗകര്യമുണ്ടാകും. ഒരു പാസില്‍ ദിവസം മൂന്ന് സിനിമകള്‍ റിസര്‍വ് ചെയ്യാം. 

മേളയോടനുബന്ധിച്ച് മലയാളസിനിമയുടെ 90 വര്‍ഷങ്ങള്‍ എന്ന പ്രദര്‍ശനം കനക്കുന്ന് പാലസില്‍ ഡിസംബര്‍ 7ന് ആരംഭിച്ചു. ദിവസവും രാവിലെ 10മുതല്‍ വൈകീട്ട് 6വരെയാണ് പ്രദര്‍ശനം. പ്രദര്‍ശനവും മേളയും ഡിസംബര്‍ 15ന് അവസാനിക്കും.
Screening Schedule