ഇന്ത്യന്‍ ഫിലിം ഫെസ്റ്റിവല്‍ ഓഫ് മെല്‍ബണില്‍ മികച്ച നടിയായി തിരഞ്ഞെടുക്കപ്പെടാന്‍ മത്സരിക്കുന്നവരുടെ കൂട്ടത്തില്‍ കാവ്യയും. അടൂരിന്റെ പിന്നെയും എന്ന ചിത്രത്തിലെ പ്രകടനമാണ് കാവ്യയെ ഈ പട്ടികയിലെത്തിച്ചത്.
ആലിയ ഭട്ട്, വിദ്യാ ബാലന്‍, റത്‌ന പഥക് ഷാ, തനിഷ്ഠ ചാറ്റര്‍ജി, എന്നിവരാണ് പട്ടികയില്‍ സ്ഥാനം പിടിച്ച മറ്റു നടികള്‍. മികച്ച നടന്മാരുടെ പട്ടികയില്‍ അമിതാഭ് ബച്ചന്‍, അമീര്‍ ഖാന്‍, രാജ്കുമാര്‍ റാവോ, ഹൃത്വിക് റോഷന്‍, ലലിത് ബേല്‍, ആദില്‍ ഹുസൈന്‍, സുശാന്ത് സിംഗ് രജ്പുത് എന്നിവരാണുള്ളത്.
ഈ മത്സരത്തില്‍ വിജയിച്ചാല്‍ ഇപ്പോഴത്തെ സാഹചര്യത്തില്‍ കാവ്യയ്ക്ക് കിട്ടുന്ന ഏറ്റവും വലിയ അംഗീകാരമായിരിക്കുമിത്. കാവ്യ -ദിലീപ് വിവാഹത്തിനുമുമ്പ് ഇരുവരും ഒന്നിച്ച ചിത്രമാണ് പിന്നെയും. നീണ്ട ഒരിടവേളയ്ക്കു ശേഷം ഇരുവരും ഒരുമിച്ചഭിനയിച്ച സിനിമയുമാണ് പിന്നെയും. ദിലീപിനും കാവ്യയ്്ക്കും ആദ്യമായി അടൂര്‍ ചിത്രത്തില്‍ വേഷമിടാന്‍ സാധിച്ചതും പിന്നെയും എന്ന ചിത്രത്തിലൂടെയാണ്. കാവ്യയുടെ ചിത്രത്തിലെ പ്രകടനം നിരൂപക പ്രശംസ നേടുകയും ചെയ്തിരുന്നു.
കാവ്യ ഏറ്റവുമൊടുവിലായി അഭിനയിച്ച ചിത്രം കൂടിയാണിത്. വിവാഹ ശേഷം ചിത്രങ്ങളിലൊന്നും കാവ്യ ഇതുവരെ അഭിനയിച്ചിട്ടില്ല. ഇനിയൊരു മടങ്ങിവരവില്ലെങ്കില്‍ പിന്നെയും കാവ്യയുടെ സിനിമാജീവിതത്തിലെ അവസാനചിത്രമാവും.
അവാര്‍ഡിന് സമര്‍പ്പിച്ചിട്ടുള്ള മികച്ച ചിത്രങ്ങള്‍ പിങ്ക്, ഏ ദില്‍ ഹെ മുഷ്‌കില്‍, സുല്‍ത്താന്‍, ജോക്കര്‍, എംഎസ് ധോണി; ദ അണ്‍ ടോള്‍ഡ് സ്‌റ്റോറി എന്നിവയാണ്.
എസ് എസ് രാജമൗലി (ബാഹുബലി 2), കൊന്‍കന സെന്‍ ശര്‍മ്മ , നിതേഷ് തിവാരി, അലംകൃത ശ്രീവാസ്തവ, വിക്രമാദിത്യ മോട് വാന, എന്‍ പത്മകുമാര്‍, നിഖില്‍ മഞ്ജൂ എന്നിവരാണ് മികച്ച സംവിധായകനാരെന്നുള്ള പട്ടികയില്‍ ഇടം നേടിയിരിക്കുന്നത്.
