കമല്‍ സംവിധാനം ചെയ്യുന്ന മലയാളത്തിന്റെ സ്വന്തം എഴുത്തുകാരി മാധവിക്കുട്ടിയുടെ കഥ പറയുന്ന ആമിയിലെ വീഡിയോ ഗാനങ്ങള്‍ റിലീസ് ചെയ്തു. എം ജയചന്ദ്രന്റെ സംഗീതത്തില്‍ ശ്രേയ ഘോഷാലിന്റെ മധുരശബ്ദത്തില്‍ പുറത്തിറങ്ങിയ ഗാനം ആമിക്ക് ഒരു നൊസ്റ്റാള്‍ജിക് ഫീല്‍ നല്‍കുന്നു.
റഫീഖ് അഹമ്മദിന്റേതാണ് പാട്ടിന്റെ വരികള്‍, പാട്ടിലെ ബംഗാളി വരികള്‍ അര്‍ണബ് ദത്തയാണ് ശബ്ദം നല്‍കിയിരിക്കുന്നത്. മഞ്ജുവാര്യര്‍, മുരളി ഗോപി, ടൊവിനോ തോമസ്, ശ്രീദേവി ഉണ്ണി, ജ്യോതി കൃഷ്ണ എന്നിവരെയെല്ലാം ഗാനരംഗത്ത് കാണാം.
കേരളത്തിലും പശ്ചിമബംഗാളിലുമായാണ് ഗാനം ചിത്രീകരിച്ചിരിക്കുന്നത്.ആമിയുടെ വിവിധ പ്രായത്തില്‍ ഗാനരംഗത്ത് മഞ്ജുവാര്യര്‍ പ്രത്യക്ഷപ്പെടുന്നുണ്ട്. മനോരമ മ്യൂസിക് ആണ് ഗാനം പുറത്തിറക്കിയിരിക്കുന്നത്. റീല്‍ ആന്റ് റിയല്‍ സിനിമാസിന്റെ ബാനറില്‍ റാഫേല്‍ തോമസ് ആണ് ചിത്രം നിര്‍മ്മിക്കുന്നത്.
ചിത്രം ഫെബ്രുവരി 9ന് തിയേറ്ററുകളിലെത്തുമെന്നാണ് പ്രതീക്ഷിക്കുന്നത്.
